සියුම් ගිණි පුලිඟු හෙට මහා ලැව්ගිනි

මේක මේ ඊයෙ පෙරේදා ඇහුන එකක්.

ලියනවද නැද්ද කියලා හිත හිත ඉඳලා ඔන්න ඔහෙ ලියනවා කියලා හිතලා ලියලා දානවා.

අඳුරන ගෙදරක පුතෙක්ට (අවුරුදු 10ක් 12ක් ඇති) නෑයො එද්දි තෑගි ගෙනත්. පොර පට්ට හැපි එකේ ඒවයෙන් සෙල්ලම් කරලා කරලා කට්ටිය ගියාට පස්සෙ හවස ෂේප් එකේ ඉන්න වෙලාවෙ අම්මා අහලා..

කොහොමද පුතා සෙල්ලම් බඩු. ඉවරද සෙල්ලං කරලා" කියලා

මේකා කිව්වලු. "ඔව් ඔව් හොඳයි.. සෙල්ලංනං කලා.. ඒත් ඒවා අරන් තියෙන්නෙ මුස්ලිම් කඩේකින්" කියලා

පොඩ්ඩව ෂේප් කරන්න හිතං අම්මා කියලා

"ඉතිං මුස්ලිම් උනාට මොකද? එයාලත් අපි වගේ තමයි. හැමෝම එකයි" කියලා

පොඩි එකා "නෑ ඒත් මං බයේ හිටියෙ බෝම්බයක්වත්ද දන්නෑනෙ" කිව්වලු..

රටකට වෙමින් යන දේ ඇස් පනාපිට දකිනකොට ටිකක් අමාරුයි. ළමා මනසේ අද පත්තුවෙන සියුම් ගිණි පුලිඟු හෙට මහා ලැව්ගිනි බවට පත්වීමට නියමිතය. ටීවී රේඩියෝ පත්තර කටකතා, ජාති ආගම් මනුසත්කම් පාගා දමමින් වෛරය වපුරමින් සිටී. අපේම මිනිසුන්ගේ පතුරන දේ දෙස බලාසිටින දැන් පොඩි උන්ට ඒ ගැන මෙලෝ අදහසක් නැත. උන් කරන්නේ කියන්නේ වැඩිහිටි අපි  කරන කියන දේවල්ය. උන්ට ඇහෙන්නේ දකින්නේ අපි අහන පෙන්වන දේවල්ය. උන් විශ්වාස කරන්නේ උන්ගේ වැඩිහිටි පරම්පරාවය. 

පොඩි උන්ගේ ඔලු හදන්නේ අපිමය. හොඳට හෝ නරකට දෙකටම අපිමය. සිංහල සහරාන්ලා බිහි කිරීම සිදුවන්නේ අප අතින්මය. දැන හෝ නොදැන දැන් දැන් එය සිදවෙමින් පවතී..

බෞද්ධ යැයි කියාගන්නා, උදම් අනනා ඔබ ඒ ආගමේ ඉගැන්වීමට අනුව සිතුවහොත් ඊළඟ ආත්මයේ මුස්ලිම් මවකට දාව ඉපදීමෙන් සියල්ල කණපිට පෙරලෙනු ඇත. එවිට ඔබට අලවන ලේබල මත්තේ නැසීමට ඔබටත් සිදුවනු ඇත. කිසිවක් ඔබට තීරණය කළ නොහැක. 

වැරදි වලින් මිනිසුන් ඈත් කිරීමට, ජීවිතයේ අවසාන අරමුණක් ඇති කිරීමට මෙන්ම මරණින් මතු ජීවිතය ගැන බියක් ඇති කොට මිනිසුන් යහපත් කිරීමේ අරමුණින් ආගම් බිහි වූ බවත් ඒවාට ඒ ඒ කාල වලදී ඒ ඒ පුද්ගලයින් වෙන වෙන නම් දමා ගත්තායැයි සිතීම අපහසුනම් දැන් ඒවා සිදුකරමින් සිටින්නේ බලයට පොරකන දේශපාලුවන්ට කඩේ යාම බවවත් තේරුම් ගන්න.

අද ඔබ අසල සිටින සමනලයෙකුගේ පියාපත් පහරින් ඊට සැතපුම් දහස්ගාණක් දුරින් මහා සුළි කුණාටුවක් ඇති වීමට හැකි බවට තියරියක් ඇත. සුළි කුණාටු කෙසේ වෙතත් මේ වෙමින් යන මොළ ශෝධනයේ අනාගත සංහාරයන්ගෙන් ඔබ, ඔබගේ දරුවා මෙන්ම දරුවන්ගේත් දරුවන්ද විඳවීමට නියමිත බව සිහිතබා ගන්න.