සක්විත්තෝල්මාදය..

අදකාලේ මිනිස්සුන්ට වෙන ලොකුම ප්‍රශ්ණයක් තමයි තමන් කරමින් හිටියෙ මොකක්ද කියන එක අමතක වීම. ඒක ලෙඩක්ද නැත්තං හැටිද කියලා දන්නෑ. ඒත් එහෙම වෙන එක මාර අවුලක්. ඒකෙන් වෙන්නෙ තමන්ට තිබුනු තැනත් අහිමි වෙන එක එහෙමත් නැත්තං එහෙම එකෙක් නැත්තටම නැති වීම. 

උදාහරණයක් විදියට ඉරාජ්. මුල් කාලේ ඉරාජ් කියන්නෙ මටනං පට්ට පොරක්. භාතිය සන්තුෂ්ලා කරපු වැඩේ ඉස්සරහට අරන් යන්න සෑහෙන්න වැඩක් කරපු එකෙක්. පොරගෙ පළවෙනි album එක ඒකට හොඳ සාක්ෂියක්. පස්සෙ මොකද වුනේ. පොරට එකපාරම තමන් කර කර හිටපු එක අමතක වුනා. ඒකට හේතුවෙච්ච සල්ලි, ජනප්‍රියකම වගේ හේතුත් තියෙනවා. කාලෙන් කාලෙට ට්‍රැක් මාරු වෙවී ට්‍රැක් මාරුවෙවී ඇවිත් දැන් ඉරාජ් වෙන කොහේද තැනක ඉඳන් මොනාද ටිකක් කරනවා.

අපේ රටේ මේකට උදාහරණ ඕනතරං තියෙනවා. දේශපාලඥයෝ ඔක්කොම කිසි හිරිකිතයක් නැතුව මේ බාල්දියට දාන්න පුලුවන්. මොකද කරන්න යන්නෙ අවංකවම රටට වැඩක් වෙන්න පුලුවන්. හැබැයි පස්සෙ මොණර කොළ රහට ලෝකෙ තියෙන තුප්පහිම වැඩත් කරනවා.

You tube channel කරන අයගෙන් බහුතරයක් දැන් කරන්නෙ ඕක. සමහර අය සමාජයේ හිතසුව පිණිස ජනතාව දැනුවත් කිරීම උදෙසා පටන්ගත්තු චැනල් දැන් තනිකරම ගණිකා මඩම්, මඩ ප්‍රචාර වලින් පිරිච්ච කුණුහරප මාකට් එකක් වෙලා. ප්‍රධාන හේතුව කරපු දේ අමතකයි.

මිනිස්සු ඉල්ලන දේ දෙනවා, මේක තමා මාකට් වෙන්නෙ, මේකත් එක විදියක සමාජ මෙහෙවරක් වගේ ගොබ්බ කතාකියලා මේක සාධාරණීයකරණය කරන්න බෑ. මොනා කිව්වත් මේක ඊට එහා ගිය ව්‍යාධියක්. රට පුරාම ටිකෙන් ටික මේ ලෙඩේ ව්‍යාප්ත වෙමින් යන්නෙ. මම පුරුද්දක් විදියට youtube trending list එක බලනවා. කාලයක් තිස්සෙ. එකක් දෙකක් ඇරුනාම මේකෙ වැදගත් දෙයක් ට්‍රෙන්ඩින් වෙන්නෙ කන කැස්බෑවා වියසිදුරෙන් හඳ දකිනවාටත් වඩා කලාතුරකින්. දැන් අහපල්ලකො පුලුවන්නං ඒ මොකද්ද කියලා.

වැඩේ තව ටිකක් පැහැදිලි වෙන්න හැමෝම දන්න දැන් ජනප්‍රිය තිස්ස ජනනායක සර්ව ගම්මුකො. ඒ සර්ගෙ චැනල් එක දැන් හෙන ජනප්‍රියයි. නැගලා යනවා. හොඳ හරවත් දේවල් කියනවා. විෂයානුබද්ධව. හැබැයි මෙහෙම ගිහිල්ලා පොරට මේක රහ වැටිලා චැනල් එක ගැන හිතලා මේ කියන කතා subject එකට පිටින් කරන්න ගත්තොත්. Biology පැත්තක තියෙද්දි චැනල් එකට දාන්න සෙට් වෙන කතාම කියන්න ගත්තොත්. ළමයි අනාතයි. උන් හිනාවෙවී අහං ඉඳියි. අපිත් මාර ආතල් එකේ ඒවා බලයි. විභාගෙට ගියාමත් උන්ට වෙන්නෙ හිනාවෙවී ඉන්න තමා. එහෙම වැඩි කාලයක් දුවන්න බෑ. එක්කො ක්ලාස් නවත්තලා චැනල් එකම කරන්න ඕන. නැත්තං චැනල් එක නවත්තලා ක්ලාස් කරන්න ඕන. Balance එකේ යනතාක් හරි හැබැයි track පැන්නොත් ඉවරයි. ජනනායක සර්ටත් වෙන්නෙ සක්විතිට වෙච්ච දේම තමා. ජනනායක සර් මේ ඔබේ අවධානය පිණිසයි.

ඒ හිංදා ඔය ට්‍රැක් පැනලා යන උන් ටිකක් පරිස්සං වෙයල්ලා. සක්විත්තෝල්මාදය කියන්නෙ ලේසිපාසු ලෙඩක් නෙවෙයි. පවුලක් ගැන ජීවිතයක් ගැන ආසාවක් තියෙනවනං දැන්වත් වෙනස් වෙයල්ලා. නැත්තං වෙන්නෙ අර සක්විති සර්ට වගේ ආය මුල ඉඳලා මාලු ටැංකියක් ඉස්සරහා ඉඳගෙන ලෝකෙටම ජෝක් එකක් වෙන්න..