දමිත් කියෙව්වෙමි..

මේ කියවීම පටන්ගන්නෙ මීට අවුරුදු ගාණකට කලින් දමිත්ගෙ පළමුවෙනි මාධ්‍ය එළිදැකීම ෂා fm එක හරහා වුනු දවසෙ. බස් එකේ යද්දි එද්දි, පස්සෙ හොයාගෙන ගිහිං අහපු සිංදු වල අයිතිකාරයා චැනල් එකට ඇවිත් කියපු දේවල් මට හිතාගන්න බැරිවුනා. වැල්ලවාය ඇතිලිවැව පැත්තෙ පට්ට ඩොටක හිටපු එකෙක් එකපාරම ඇවිත් දුන්නු ටෝක්ස් මාව තනිකරම උස්සලා පොළොවෙ ගැහුවා. ඒක මාර වැඩසටහනක්. "මගෙ හුස්ම තියෙනකල් මම මිනිස්සුන්ට සිංදු කියනවා" කියලා තමයි දමිත් ඒක ඉවර කලේ. මතක විදියට ප්‍රේක්ෂක ප්‍රතිචාර හිංදා ඊගාව සතියෙත් ආයෙත් ඒකෙ රිපීට් එකක් ගහන්න චැනල් එකට සිද්ධවුනා. ඒක ඒ තරමට වැඩකලා ඒ දවස් වලත්. ගායකයෙක් විදියට විතරක් ඔලුවෙ හිටපුඑකා අන්න එදා ඉඳං මට මාර පොරක් වුනා. ඔහොම කාලෙ ගියා. මට උගෙ හඬට තිබුනෙ මාර ලව් එකක්. 

ඔහොම ගහන ගහන එක හිට් වෙවී ආපු දමිත් දවසක එනවා "මා නොවන මම" එකට. කැලුම් අයියවත් කොරේ කොර කරලා මොනාදෝ ටිකක් කියන මේකා කියපු දේවල් එක්ක ඒ වැඩසටහන ඉවර වෙනකොට මගේ ඔලුව ඇතුලෙ මට හිතාගන්න බැරි මොනාදෝ දර්ශණයක් හොල්මං කරන්න ගන්නවා. ඒක මේ අපි දන්න කියන ඒවම තමා. ඒත් වෙන පැත්තකින් බලලා කියන වෙනම කියවීමක් වගේ එකක්. හරියට අපි දන්න කියන වරහනම "("පැත්තෙං බැලුවම තැටියක් "⚫️" වගේ පේනවා වගේ වැඩක්. හැබැයි ඒක අල්ලගන්න ලේසි නෑ.

හැබැයි දමිත් ඩිල්ෂාන් අයියත් එක්ක කරපු වැඩෙත් බැලුවා. ඒක ගැන කියන්නෙ නැතුව ඉන්න හැදුවත් පස්සෙ මේ යන කතාබහත් එක්ක ටිකක් කියන්න හිතුනා. ඌ රහත් වෙලා, ඉන්නෙ වෙනම තැනක, අපි ඇතුලෙත් දමිත් කෙනෙක් ඉන්නවා වගේ නානාප්‍රකාර බහුභූත ඇහෙන්න ගත්තා. මොන මඟුලක්ද ඒ. ඒක බලපු කන බොන ටිකක් සවිඥානිකව හිතන ඕන කොල්ලෙක්ට මේ ටික අහුවෙන්නම ඕන. ඌ ඉන්නෙ බීලා. කියවන්නෙ විකාර. කිසිම මාතෘකාවක එක දිගට ඉන්නත් බෑ එකින් එක පිළිවෙලට ගලපන්නත් බෑ. ගංජා සීන් වලටත් සැරින් සැරේ ඇවිත් යනවා. අර ඉරට එහා ඉඳන් බලං ඉන්න මොකද්ද මැසිව් යානාවක් ගැන කියන්නෙ. ඒක තනිකරම ගංජා ෆීල් එකක්. වෙනම ෆැන්ටසි එකක්. හැබැයි ඒක තුලත් පොරට දිගටම ඉන්න බෑ. එකපාරම ට්‍රැක් පනිනවා. මේ අස්සෙ අරූ අහනවා උණ්ඩුකපුච්චෙ ඇඹරෙන ප්‍රශ්ණ. මුට මූවම හම්බවුනොත් මොකද කරන්නෙ.. වැඩිපුරම විඳපු දවස.. වට පිටාවෙ අනිත් අයව පේන හැටි.. වගේ අපභ්‍රංශ ප්‍රශ්ණ. (ඩිල්ෂාන් අයියෙ ඔවානං..) අර වගේ බීලා කුදාර් වෙලා ඉන්න එකෙක්ට තියා පට්ට සිහියෙන් ඉන්න මහාචාර්ය කෙනෙකුටවත් නෑ ඒවට උත්තර. මුලදි මොකද්දෝ නොතේරෙන මංගල්ලයක් කියනවා වගේ තේරුණාට පස්සෙ පස්සෙ ඌ චොර වෙනවා. බීපුවාම එක උඩ එක වාක්‍ය කටට එන්න ගද්දි, එකකට එකක් සම්බන්ධ නැති මාතෘකා ඔලුවට එද්දි, ඒ කතා පැටලිලා වෙනම කතා විදියට අමුතු වචන වලින් එළියට එද්දි, ඌ කියන එක කාටවත් තේරෙන්නෑ තමයි. හොඳට ගහලා නසරානි වෙලා ඉන්න එකෙක් එක්ක කතා කරලා බලපං. මෙලෝ හත්තිලව්වක් තේරෙන්නෑ. එහෙමයි කියලා අපි ඌ රහත් වෙලා කියන්නෑනෙ දෙයියනේ.

ඇත්ත දමිත්ට අවුලක් තියෙනවා. නැත්තං ඔය මට්ටමේ ඉඳන් ඉන්ටවීව් එකකට ෆේස් කරන්නෑ. එහෙම යන්න හිතෙන එකම අවුලක් තමා.

මේක මේ අධ්‍යාත්මිකව ලබාගත්ත මොකක්හරි අටමගලක් නෙවෙයි. ගංජා ගහලා, අරක්කු බීලා, සමහරවිට ඒ මේ අස්සෙ වැරදි ක්‍රම වලට භාවනා කරලා, ඕනවට වඩා දේවල් හිතලා කරගත්ත මානසික ලෙඩක්. උට දේවල් අහිමි වෙනකොට අර කලින් හිටපු දමිත්ම වෙන වෙන පැති වලින් හිත හදාගන්න යාමේ ප්‍රතිඵලයක් තමයි අද ඔය ඉන්න දමිත්.

අන්තිමට කියන්න තියෙන්නෙ. දමිත් ඔය ඉන්න කැලෙන් එලියට ඇවිත් බෙහෙතක් ගනිං. උඹට තියෙන්නෙ ලෙඩක් කියලා පිලිගනිං. මොකද උඹට ආදරේ මං වගේ දහස්ගාණක් උන් උඹ දිහා බලං ඉන්නවා. උඹ වගේ කාලයක් පරමාදර්ශ වෙලා හිටපු චරිත ඔහොම කිච වෙනවට අපි කැමති නෑ. 

මචං දමිත් හිටපු තැනට වරෙං. ඔය පාර වැරදියි. නැත්තං අර අශේනයා එහෙම තව ටිකදවසක් බලලා උඹව දාලා වැලකුත් ගහයි. යූ ටියුබ් හිට් ට්‍රෙන්ඩ් අස්සෙ මළ අඳෝනා අහන්න වෙලා තියෙන අපිට උඹ වගේ එකෙක් ඕන. ඇවිත් කියලා දියං උන්ට මේ මියුසික් කියන්නෙ මොකක්ද කියලා..

ඉක්මණට සනීපවෙයං..